Македонија
15. April 2018 - 17:16

На охридскиот аеродром слета првиот авион од Истанбул на „Онур Ер“

 Со лет на авиокомпанијата „Онур Ер“ од Истанбул денеска на охридскиот аеродром „Свети Апостол Павле“ пристигна првата група од 180 турски туристи што организирано ќе летуваат на Охридско-струшката ривиера.

Станува збор за прв директен чартер лет од Истанбул што ќе се реализира во текот на престојната туристичка сезона, а авионите на „Онур Ер“ ќе сообраќаат еднаш седмично на дестинација Охрид, носејќи туристи од Турција што ќе летуваат тука преку аранжманите на турскиот тур-оператор „Татилбудур“.

Првите гости на охридскиот аеродром за сезоната 2018 ги пречека министерот за транспорт и врски Горан Сугарески, посакувајќи им пријатен престој во Македонија. Според него, директната авионска линија до Истанбул е чекор во насока на дополнително унапредување и зајакнување на врските со турскиот народ.

- Туристичкото и културното богатство на Охрид и Македонија се дополнителен мотив што поголем број туристи да дојдат тука и да се запознаат со нашата традиција, рече Сугарески.

Владата, додаде, е максимално посветена на унапредување на авиосообраќајот во земјата и регионот, а воспоставувањето на авионската линија со Истанбул е потврда за атрактивноста на Македонија за авионските компании.

- Сакам да најавам дека во најскоро време ќе го објавиме јавниот повик за финансиска поддршка на нискобуџетни авиокомпании кои ќе понудат нови авиолинии, со што ќе овозможиме македонските граѓани да летаат по ниски цени кон многу метрополи, а охридскиот аеродром дополнително да го ставиме во функција, да ги искористиме неговите капацитети и да овозможиме што повеќе туристи да ја посетат Македонија, рече Сугарески.

Генералниот директор на „ТАВ Македонија“ Алпер Ерсој појасни дека оваа сезона преку 23-те предвидени летови на „Онур Ер“ заклучно со 21 октомври во Охрид ќе допатуваат повеќе од 4.500 патници од Турција, што значително ќе придонесе за зголемување на вкупниот број турски туристи во Охрид и Македонија.

Авионските билети за летовите на „Онур Ер“ од Истанбул за Охрид покрај за аранжманите на „Татилбудур“ ќе бидат понудени и во слободна продажба. Од авиокомпанијата најавија дека бројот летови може да биде зголемен и на неколку пати седмично и со продолжување на сезоната доколку постои интерес на пазарот.

Засега за Охрид има директни авионски линии од Базел, Цирих и Лондон што сообраќаат преку целата година. За престојната сезона покрај Истанбул најавени се летови од Варшава, Талин и Ајндховен, покрај постојните од Амстердам, Брисел, Тел Авив и Катовице, како и веќе договорената редовна линија од Виена.

Турските гости се значаен сегмент во вкупниот број странски туристи кои престојувале во Македонија. Минатата година Македонија ја посетиле 129.708 турски туристи што е зголемување за 22,7 проценти споредбено со 2016.

Во првите три месеци на тековната 2018 година преку македонските аеродроми во Скопје и Охрид патувале 448.729 патници, што е пораст од 22 процента споредено со минатата година. Во истиот период се реализирани 4.018 летови или 19 отсто повеќе отколку во првото тромесечие лани.